هيكل لر يئرينده ن، آس ياراغيمي

دويوش مئيدانيندا، يول آچمالييام

سونگولر دئشسه ده چال پاپاغيمي 

 

قوي، منده او شهيد قهرمانلار تك

بويانيم آل قانا، وطن عشقينه

منده بولبول لر تك، قول قاناد آچيم

قونچالار عشقينه، چمن عشقينه

  

توفنگيم، قوي اؤتگم سؤزلريم كيمي

حاكيم سرايلارين، ويران ائله سين

قير آتيم دوشمانلار جمده يي اوزره

هالايا باشلاييب، جولان ائله سين

  

جيرسين ياساقلارين صحيفه لرين

توفنگيم نئيزه سي، وورسون بير – بيره

دالغالار پوسگورسون، سونگولريندن

قان تؤكن جلادي، گومدورسون يئره

 

غضب ده نيزينده، هر قودوز جلاد

گركدير بوغولسون، كسيلسين سسي

اوجالسين گؤيلره، انتقام دئيه

آزادليق نغمه سي، اؤلوم نعره سي

  

چوخ دئديم: ديليم وار، گوله رك دوشمان

دئدي: او ديل ده ييل، نه دانيشيرسان؟

عقلين اوچوب باشدان، سرسم دئييرسن

خرابكار اولموسان، يولو چاشيرسان

 

 تحكم آلتيندا، تاپداندي ديليم

 قامچيلار، قيرمانجيلار، ياغدي هر يانا

سايين بير ديل ده ييل، بوشلا بو ديلي

سوروجو دئييردي منه، زنداندا

  

تاپدادي، چئينه دي، شيرين ديليمي

 كولتور قودوزلاري، سالدي پيس گونه

هر بيري، بير يانا چكدي، آپاردي

بو گؤزه ل پريني آتدي سورگونه

  

مونغول ييغينتي سي، عثمان تيليفي

 بو اؤتگم ديليمه دئدي غصب كار

قانمادي بو زنگين ديلين ريشه سيني

روحومدا، قلبيمده، پاك قانيمدا وار

  

نه قدر اثر وار روحدان، قلبدن

 ديليمده ياشاييب، اؤلميه جكدير

تهديدلر، قاندانلار، قارا زندانلار

اوره كدن پاك آدين سيلمه يه جكدير

  

قهرمان خلقيمين، قانلي قيامي

سون قويدو ياساغا، حقسيزليكلره

 آنا ديل قورتولدو پاسلي قفسدن

شاهين تك پر آچدي، قالخدي گؤيلره

  

ايندي آزادليغين، گؤزل باهاري

قونچالار، لاله لر، گوللر بيتيريب

شهيدلر قانيندان ايندي بو آتيب

گؤر وطن تورپاغي نلر يئتيريب؟

  

تارلالار تيتره يير، دريالار كيمي

شلاله تؤكولور، داغ ذيروه سيندن

ياماجلار، آدالار، ياشيل دون گئييب

سئوينجه دولوبدور، قهرمان وطن

  

حاضيرلا توفنگي، يَهَرله آتي

سون نفه سين چكدي، ياراماز جلاد

 بير نفر قالارسا، بو يالتاقلاردان

آنا توپراغيمي، سانمارام آزاد

  

دورموشام آماده، جانيم اووجومدا

بو آنا وطنين كئشيگينده من

اصلان تك، دؤشوندن حلال سود وئريب

شيرين ديل آچميشام بئشيگينده من!

 استاد يحيي شيدا